Vinje kommune (3 660 innb.) i Telemark strekkjer seg langt inn i Hardangervidda nasjonalpark. Vinje er den nest største kommunen i Sør–Noreg med 2 740 kvadratkilometer, og er den einaste som grensar mot fire fylke. Kommunesenteret er Åmot.

Rauland og Haukelifjell er kjende vintersportsstader i Vinje. Kommunen omfattar gamle jordbruksbygder, der geitebukken er å finne i kommunevåpenet. Vinje har i mange år hatt gode kraftinntekter frå Tokke–utbyggingane på 60– og 70–talet. Attføringssenteret i Rauland er den største private arbeidsgjevaren. Boreriggprodusenten Qmatec Drilling (tidl. Nemek) er ei viktig bedrift.

Kommunen har ein stor eigedom i nasjonalparken, Berunuten Vest, med seks hytter til bruk for alle som fer forbi. Eigedommen vart kjøpt frå brukseigar Treschow i Larvik i 1979.

Vinje er ei kjend kulturbygd, som har vore heimstad for ei lang rekkje kunstnarar og kulturpersonar, som f.eks. Aasmund Olavsson Vinje og Tarjei Vesaas. Brørne Åsmund og Odd Nordstoga er kjende kulturpersonar i dagens musikkbilde.

Olavsrosestaden Mjonøy ligg i Vinje.