Ulvik herad

Ulvik herad (1 100 innb.) ligg inst i Hardangerfjorden, rundt fjordarmane Ulvikfjorden og Osafjorden. Heradet strekkjer seg langt inn  på Hardangervidda. Den vestlege delen av Hardangerjøkulen og Hallingskarvet ligg i Ulvik. Jordbruket er prega av frukt– og bærdyrking og sauehald. Hjeltnes gartnarskule ligg i heradet. Ulvik har elles skogsdrift, og har lange tradisjonar som turistmål.

Kvemmadokkje Husmannsplass

Kvemmadokkje er ein husmannsplass på garden Børsheim i Ulvik. Den ligg ca. 200 m vest for hovudtunet. Plassen var teke opp i byrjinga av 1800-talet. Siste husmannen dreiv plassen til om lag 1930. Yngste dottera, Guri, budde her til 1967. Namnet Kvemmadokkje kjem av at den fyrste husmannen kom ifrå Kvam, og at plassen ligg i ei dokk (eit søkk). Eigarane av Børsheim har restaurert og ivareteke plassen, først i 1970-åra, og så ei fullstendig utvendig restaurering for få år sidan.
Les meir...

Rallarmuseet og Dokumentasjonssenter Bergensbanen

Museet syner førearbeid, prosjektering, stikking og bygging av Bergensbanen i åra 1871 til opninga i 1909. Levande smie og museumskafe: Rotaren kafe med souvenirsal held til i austre lokomotivstall på Finse saman med Dokumentasjonssenter Bergensbanen. Eige temautstilling: "Kampen mot snøen" ved og i austre lokomotivstall med historisk snøryddingsutstyr og utstilling om korleis høgfjellstrekninga til Bergensbanen vart halden open gjennom heile vinteren. Rallarbrakke med kokka Oline anno 1900!
Les meir...

Skeiemylna

Skeiemylna ligg ved den gamle steinbrua frå 1896 over elva Tysso. Under golvet er eit murt kammer med turbinen. Drivverk og konstruksjonar er av grove dimensjonar. Vasskrafta dreiv også maskinar for reinsking og sikting av mjølet, dessutan eit sinnrikt heis-system, frå kjellar til loft. Mylna vart sett opp i Ulvik kring 1890. Men soga til Skeiemylna er mykje eldre. Ho har stått ved Mulelven i Sandviken sidan tidleg på 1600-talet. Etter mange års forfall er huset nyleg restaurert. Toppetasjen er klar til bruk for ulike kulturaktivitetar.
Les meir...

Øydvinstod Kultursti

Øydvinstòd kultursti fortel om den gamle gangvegen og bygdevegen langs Osafjorden. Vegen gjekk frå Brakanes om Kvåle til Øydvinstòd. Ein arm gjekk ned til Øydvænaustæ - der osingane og andre hadde landingsrett og gjekk inn til handelsstaden og kaien. Det var ein offentleg veg. Informasjonsfaldar om kulturstien finn de på www.oydvin-gard.no.
Les meir...